رحلة البحث عن لابتوب خلال رحلة البحث عن لابتوب اشتريه اتعلمت التالي

 رحلة البحث عن لابتوب

خلال رحلة البحث عن لابتوب اشتريه اتعلمت التالي:

1- ما تشتريش لابتوب بشاشة تاتش

2- ما تشتريش حاجة مش فاهمة هية لابتوب ولا تابليت، نظام 2 في 1 ده

3- لو معاك فلوس ابعد عن الأجهزة استيراد الخارج، لو مش معاك فربنا يعينك

4- موقع سوق أرخص من موقع جوميا، وناس بتفهم

5- ما تتوهمش ب i7 وتنسى هو من أنهي جيل (الجيل العاشر حلو)

6- لو مش ناوي تلعب عليه جيمز بشكل قوي، مافيش داعي تجيب لابتوب اسطوري من نايحة البروسيسور والرامات وكارت الشاشة وسعره غالي على الفاضي

7- لو مش بتلعب جيمز، ف 15 ألف هيجيبولك حاجة فوق احتياجاتك

8- لو معاك 7 آلاف تقدر تشتري لابتوب إمكانياته مش واو، لكن ماشي حاله، أحسن بكتير من القديم اللي عندك

9- خلي بالك، البروسيسور القوي وكارت الشاشة القوي بيستهلكوا طاقة أكتر، يعني بيسخنوا والمروحة تفضل شغالة واللابتوب مش هيكون هادي

10- لو عايز روقان بال فخليك في بروسيسور يكون U مش H علشان استهلاك الطاقة أقل وما يسخنش أوي، وبالمرة خليك في هارد يكون SSD بردو لزوم الهدوء وطبعا هيكون أسرع، وممكن كمان تجيب بروسيسور G7 ومن غير كارت شاشة إضافي علشان بردو يستهلك طاقة أقل

الخلاصة: اشتري من موقع سوق لابتوب يكون i5 جيل عاشر ولو بروسيسور G7 أو U يبقى حلو