جديد | ازاي تعمل مكالمات صوتية أو فيديو على واتساب من اللابتوب

 جديد | ازاي تعمل مكالمات صوتية أو فيديو على واتساب من اللابتوب؟

واتساب الفترة اللي فاتت عملوا تحديث جديد وهو إنك تقدر تكلم أي حد من جهات الإتصال المتسجلة عندك مكالمة صوتية أو فيديو من خلال اللابتوب، يعني الموضوع أصبح مش مقتصر على تطبيق الموبايل، وده هيخدم ناس كتيرة وخاصة اللى شغالين أونلاين.

لكن فيه شوية حاجات لازم تعرفها قبل ما تستخدم الخدمة دي:

- المكالمات هتم من خلال تطبيق واتساب على اللابتوب وليس web.whatsapp

- لازم تمنح واتساب إذن الوصول إلى الميكروفون والكاميرا في اللابتوب بتاعك.

- لازم تكون متصل بالنت من موبايل عشان تقدر تقتح الواتساب على اللابتوب، يعني وأنت بتتكلم من اللابتوب بتاعك والنت فصل على موبايلك، الواتساب هيفصل برده.

- التحديث متاح للأجهزة اللي شغالة بنظام ويندوز 10 الإصدار رقم 1903 أو أي إصدار أحدث، ولو بتستخدم ماك يبقى نظام التشغيل macOS 10.13 أو أي إصدار أحدث.

- المكالمات هتظهر في نافذة لوحدها بحيث تقدر تتحكم في حجمها على الشاشة بحيث لو حابب تعمل أي حاجة تانية وأنت بتتكلم على اللابتوب.

- التحديث خاص بالمكالمات الفردية بس، يعني شخص يكلم شخص، مينفعش تعمل مكالمات جماعية، لكن التحديث ده جاي في الطريق.

- وأنت بتتكلم على اللابتوب، الموبايل ملوش علاقة، يعني تقدر تستخدم الموبايل في أي استخدام  تاني لأن المكالمة مش هتبقى مشتركة بين الموبايل واللابتوب، لكن بس الأهم إن يكون النت شغال على الموبايل زي ما وضحنا سابقاً.

- عشان تبدء تكلم أي حد، كل اللي هتعمله إنك هتفتح الشات معاه، وهتلاقي فوق ظاهر لك أيقونة الصوت وأيقونة الفيديو، اختار اللي أنت عايزه واضغط عليه، وفي حالة لو حد اتصل بيك هيظهر لك نافذة على الشاشة وفيها رفض أو قبول المكالمة.

- ممكن تكتم صوت المايك من خلال الضغط عليه، وترجع تشغله تاني من خلال الضغط عليه تاني.

- ممكن تكون في مكالمة صوتية وحابب تغيرها لمكالمة فيديو، كل اللي عليك إنك تضغط بس على أيقونة الكاميرا.