مصطلحات السات ✍✍ هنعمل مراجعة سريعة على أهم مصطلحات السات و معناها

 # مصطلحات السات ✍✍

 هنعمل مراجعة سريعة 

 على أهم مصطلحات السات و معناها 👌

 ⚠️ السيرفر : - 

 هو بيانات بتحطها ع الرسيفر عشان تفتح القنوات المشفرة ( إللى تقدر تفتحها بالنت ) 

 يعنى عشان تقول سيرفر لازم تقول نت ، 

 ↗️ أنواع السيرفرات كتيييير ، منها سيرفرات بتحتاج نت قوى و ثابت و بتسحب كتير من باقتك و هو ده ال Iptv .

 و منها سيرفرات بتحتاج نت بسيط { الشيرنج } و بتسحب قليل جدا من باقتك ، ممكن 200 ميجا أو أقل فى الشهر ( رقم تقريبى ) .

 ↖️ ال Iptv :  

 👈 المميزات : 

 ✔ بيفتح البى إن العربية ، فبتقدر تضمن الفرجة على بطولات أفريقيا ( أصعب  حاجة فى مشاهدتها بالنسبة لأصحاب الأطباق الصغيرة الأقل من 180 سم ) .

 ✔ بيتيح لك مشاهدة قنوات تانية مابتكونش فاتحة بالسيرفرات العادية ( حسب ما  صاحب السيرفر يقول أو حسب الملف بتختلف القنوات المتاحة ) .

 ✔ مش بيحتاج طبق ، عشان مالوش علاقة بالإشارة ، بيعتمد أولا و أخيرا ع النت و قوته و ثباته .

 ✔ ممكن تحطه على الشاشات إللى بتدعمه 

 ( الشاشات ال سمارت ) .

 👈 العيوب : 

 ❌ معظم السيرفرات إللى م النوع ده إللى بتيجى ع الأجهزة ( مجانية يعنى ) بتبقى تعبانة و بتقطع حتى مع النت القوى .

 ✖ الإعتماد الكامل على قوة النت و ثباته  ، يعنى لو النت هيّس بس حاجة بسيطة بتفقد متعة المشاهدة المتواصلة .

 ✖ بيختلف قوته حسب الرسيفر ( أنا ماعنديش فكرة قوى عن الرسيفرات أصحاب ال Iptv القوى 😊 ) .

 ✖ طبعا بيخلص النت كباقة تحميل طبعا ، خصوصا مع الجودة النضيفة للقناة( كل  ما جودة القنوات تكون أعلى يسحب نت أكبر ) ، ممكن مثلا يسحب جيجا فى الماتش  الواحد ( رقم تقريبى ) .

 🤚 آخر حاجة فى حوار ال Iptv  ، إن فيه خاصية إسمها { IP TO SAT }، مشتقة من  ال Iptv ، بتمكنك من مشاهدة القنوات من غير ما تدخل قايمة ال Iptv ، يعنى  بتقلب من قايمة القمر نفسه و ممكن تبقى ثابتة أكتر و بتسحب نت أقل من ال  Iptv حاجة بسيطة( إكتشف بنفسك ) ،،،،،

 و كمان حضرتك دعبس فى الرسيفر  بتاعك عليها، عشان أنواع الرسيفرات كتيييير و يبقى كداب إللى يقول لك إنه  يعرف كل رسيفر عليه الخاصية دى ولا ،،،

 والخاصية دى بتخش جوه المنيو  بتاع جهازك و تبدأ تبحث هى موجودة فين ( بيختلف مكانها و مصطلحها  من رسيفر  للتانى فحضرتك إبحث بنفسك ف جهازك ) .

 ↖️ السيرفرات إللى بتحتاج نت بسيط { الشيرنج } :

 دى أنواعها كتيييير 

 زى 

 1️⃣ السيسكام { Cccam } ؛

 ، و ده ( بنسبة كبيرة ) أى رسيفر ينفع يتوصل له نت بيدعمه 

 2️⃣ ال إم جى كام { Mgcam } ؛

 زى السيسكام بالظبط 

 بس فى رسيفرات بيبقى السيسكام معاها ثابت أكتر و فى رسيفرات بيبقى ال إم  جى كام بيبقى معاها ثابت أكتر ( حضرتك إكتشف بنفسك ، حط البيانات و جرب )  فى خانة ثابتة فى بيانات ال إم جى كام مكتوب فيها Des key بتكتب فيها 

 0102030405060708091011121314

 3️⃣ الفوريفر { Forever } ؛ 

 سيرفر بييجى على رسيفرات معينة و بيبقى إصدارات ، يعنى ممكن فوريفر يبقى  فاتح على جهازك قناة و فوريفر على جهاز جارك مش فاتحها ، فالسيرفر بيختلف  من رسيفر للتانى( لو عايز تعرف قبل ما تشترى إيه القنوات إللى ممكن  الفوريفر إللى ع الجهاز الفلانى يفتحها إسأل حد معاه الجهاز 😊 ) 

 سيرفر الفوريفر ماينفعش تضيفه لرسيفر لا يدعمه من الأساس ، يعنى مايبقاش رسيفر مش بيدعم السيرفر و تسأل أنا ممكن أحط عليه فوريفر 🙄😒

 السيرفر بيبقى مدة و بعد ما يخلص بتجدد 

 أهم رسيفرات الفوريفر 

 ستار سات 90000 و 2000 و T14 

 كيوماكس H7  و H8

 4️⃣ الفان كام { Funcam } ؛ 

 زى الفوريفر بس تقريبا مش إصدارات ، كله واحد 

 أهم رسيفرات الفان كام 

 ستار سات 4080

 سالك H1

 5️⃣ ال أوركا { ORCA } ؛

 زى الفان كام 

 بس ده  مجانى مدى الحياة 

 أهم رسيفرات ال أوركا 

 آيكون

 6️⃣ الناشير { Nashare } ؛

 زى الفان كام 

 أهم رسيفرات الناشير 

 سيناتور و نوفا 

 👈 مميزات سيرفرات الشيرنج 

 ✔ مابتحتاجش سرعة تحميل عالية . للدرجة( يادوب 512 ممكن تشغلها ) .

 ✔ بتفتح قنوات كتيييير ( حسب السيرفر ) .

 ✔ التكلفة بسيطة .

 ✔ الطريقة بسيطة( ممكن تاخد نت للرسيفر من موبايلك عن طريق إنك بتعرف شبكة الموبايل على الرسيفر ) .

 👈 العيوب ؛

 أكبر عيب هو إنك مابتقدرش تتفرج على مباريات أفريقيا( خصوصا مباريات الأندية ) غير على أطباق كبيرة من 180 سم مثلا .

⚠️ المجانى : -

 الكلمة بتتقال على القنوات المفتوحة من غير نت أو القنوات إللى بتفتح  بشفرات سهلة زى شفرة البيس مثلا فبتبقى أقرب للمجانى زى قنوات فارزتش و  فوتبول ع الياه مثلا ، الشفرات دى بتبقى أرقام بتدخلها على جهازك .

 ⚠️ الأنتينا :

 هى فلاشة بتحطها ع الرسيفر تلقط واى فاى عشان تربط الرسيفر بالنت .

⚠️ الفيدات : -

 دى بتبقى قنوات مؤقتة بتظهر وقت الماتشات ، بتبقى ناقلة من قنوات تانية ،

 👈 العيوب 

 محتاجة أطباق كبيرة من 180 سم مثلا 

 👈 المميزات 

 ✔ هى أضمن وسيلة فى عالم السات بعد البى إن العربية فى مشاهدة مباريات إفريقيا ( خصوصا مباريات الأندية ) ،

 ✔ بتبقى أوقات كتير صورتها أنضف من القنوات إللى بتنقل منها .

⚠️ الدايزك : - 

 مشترك عشان تجمع عليه كذا قمر ينزلوا للرسيفر بسلك واحد 

 فى مصر فيه منه نوعين

 الدايزك ال 4 مخارج ، بيشيل لحد 4 أقمار

 زى الترومان و الفيجا .

 الدايزك ال 8 مخارج ، بيشيل لحد 8 أقمار 

 زى ستار تراك و فيجا .

 ⚠️ العدسة : -

 هى القطعة إللى بتلقط بيها الإشارة و بتتحط ع الطبق ( عشان تنزل قمر لكذا  رسيفر لازم يبقى عدد مخارج العدسة بعدد الرسيفرات إللى هتنزل لها القمر ،  يعنى هتنزل قمر ل 3 رسيفرات ، تبقى العدسة ب 3 مخارج وهكذا ) .

 ⚠️ الفلانشة : -

 هى القطعة إللى بيتحط جواها العدسة و يتقفل عليها كويس عشان الإشارة تبقى ثابتة .

 ⚠️ المسطرة : -

 هى الحديدة إللى بيتحط عليها العدسة جوه فلانشة .

 ⚠️ ال إفّ كونّكتور : -

 هى الصامولة إللى بتقفل على سلك الدش عشان تحط السلك فى العدسة أو الدايزك أو التيونر بتاع الرسيفر .

 ⚠️ التيونر : -

 هو مستقبل الإشارة ، يعنى المكان إللى فى الرسيفر من الخلف إللى بتركب فيه سلك الدش أو بالأصح ال إفّ كونكتور .