ازاي تتحكم في الرسائل اللي بتجيلك على الماسنجر؟

 ازاي تتحكم في الرسائل اللي بتجيلك على الماسنجر؟

ناس كتيرة بتسأل ازاي تمنع حد من غير الأصدقاء إنه يبعت رسالة على الأكونت، خاصة البنات اللي بمجرد ما بينشروا بوست في أي جروب، بيلاقوا كمية كبيرة من السخافة وصلت لهم على الخاص.

فازاي كل واحد يقدر يتحكم في الرسائل اللي بتجيله ويمنع أي حد من غير الأصدقاء إنه يبعت رسالة؟

الموضوع فيه كذا خيار، وكذا فئة أي حد يقدر يرفض إنهم يبعتوا له رسالة.

طب يعني ايه الكلام ده؟ 🤔

تعالوا نوضح ببساطة 👌

مبدأيا كده أي حد معاه رقم موبايلك ومش شرط أنت تكون مسجله عندك، أو شخص من أصدقاء الأصدقاء - يعني هو ضايف واحد والواحد ده ضايفك - ، أو أي حد أنت عامله متابعة على إنستجرام أو هو عاملك متابعة ومش شرط أنتم الاتنين عاملين متابعة لبعض، أي حد من دول ممكن يبعت لك رسالة، لكن الرسالة دي مش بتظهر لك في الـ inbox بتاعك مباشرة لأن محصلش بينك وبينهم أي حوار قبل كده، ولكن بتروح في " طلبات المراسلة " اللي هتلاقيها عندك في الماسنجر برده.

طيب ازاي أصلا تمنع أي حد من دول من البداية إنه يبعت لك؟ 

1- افتح الماسنجر 

2- بعد كده اضغط على صورتك من فوق

3- بعد كده اختار الخصوصية 

4- بعد كده اضغط على message delivery هتلاقي ظهرلك عدد من الخيارات، الخيارات دي اللي تقدر تتحكم فيها وبسهولة تمنع أي حد من إنه يبعت لك رسالة.

بس خلاص 😀

يا رب يكون البوست مفيد ليكم