النهاردة توصّل العلم بشكل يقيني إن الضغط العصبي والقلق والتوتر هما العامل الأكبر ورا تحوّل لون الشعر من الأسود للرمادي أو "الأبيض" ودي أول أعراض الشيخوخة والتقدم في العمر

 النهاردة توصّل العلم بشكل يقيني إن الضغط العصبي والقلق والتوتر هما العامل الأكبر ورا تحوّل لون الشعر من الأسود للرمادي أو "الأبيض" ودي أول أعراض الشيخوخة والتقدم في العمر .. وده بعد ما كانت مجرد نظريات طبية تحتمل الصواب والخطأ.. دلوقتي كل المجلات العلمية بتأكد صحة الأبحاث بشكل لا يدع مجال للشك..

بعد أبحاث ودراسات على الفئران بعدين على البشر.. العلماء اتأكدوا إن الضغط العصبي والقلق والتوتر و الصدمات المفاجئة هما السبب الرئيسي ورا ضرر الخلايا الجذعية إللي بدورها بتتحول للخلايا الصبغية المسؤولة عن لون الشعر.. ومش بس لون الشعر.. الخلايا إللي بتكون مسؤولة عن نضرة البشرة وتجديد الخلايا الميتة.. الخلايا الجذعية دي من أهم الخلايا في جسم الإنسان .. وللأسف الضغط العصبي بيقضي على الخلايا دي تماما ومش بتتجدد تاني أبدا.

و بالمناسبة الضغط العصبي والقلق والتوتر مش بس بيقضوا على الخلايا إللي بتجدد نضارة البشرة ولون الشعر.. دول كمان سبب ورا أمراض القلب والضغط وسبب في ضعف وظايف الكلى وكمان بيسبب الأرق ومن أسباب ضعف النظر.. الناس إللي بتتعرض لكل القلق والتوتر بيحرقوا من عمرهم وصحتهم وهما مش واخدين بالهم.

الناس إللي بتطبق 60 و 70 ساعة متواصلين.. والناس إللي بيفكروا 24 ساعة في اليوم والناس إللي بتعمل مجهود نفسي وعقلي لفترات متواصلة.. والناس إللي بتحط نفسها في مسؤوليات ضخمة تتوزع على شركة بحالها وتشيل الليلة لوحدها.. الديون والمرض والخوف من المستقبل والخوف على الأولاد والقلق من الحياة الاجتماعية وعدم الثقة في النفس.. كل ده يساوي خلايا جذعية مش بتتجدد

تخلصوا من الضغط العصبي يا جماعة.. متخلوهوش يسيطر عليكم وعلى حياتكم وصحتكم.. الضغط والتوتر والقلق بيعجّزوا الواحد بدري ويخلوه يحس إنه بيكبر اليوم في ساعة .. وفي نفس الوقت متحطوش الناس في ضغوط ميستحملوهاش.. الضغط عمره ما يطلّع إنسان سوي.. الضغط بيخلق بني آدم دايما عنده شعور بالذنب إنه غير كفؤ..

و الإحساس ده من أكبر دوافع الإنتحار.