لو أنت خريج أو هتتخرج و مهتم بمجال التكنولوجيا أو الديزاين و الجرافيك فالبوست دا ليك ، و لو مش مهتم أقرأه بردة هيخليك تهتم 😂😌

 علكم بخير حاال ي طيبين  🤍🦋

لو أنت خريج أو هتتخرج و مهتم بمجال التكنولوجيا أو الديزاين و الجرافيك فالبوست دا ليك ، و لو مش مهتم أقرأه بردة هيخليك تهتم 😂😌

و شد كرسي كدا و هات كوبايه نعناعك ويلا نبدأ ( مش شايك لأ عشان مش بحبه انا عنصريه معلش 🥱😂) 

بما إني شوفت إن ف ناس كتير متعرفش عن منحه ال 

Information Technology Institute (ITI)

 للخرجين و ال قربت تفتح ، معادها المفروض أول أو نص شهر سبعه ، دا ما لم يجد جديد بسبب الظروف الحاليه ، ف أيا كان نعمل ال علينا و نحاول نستعد ليها خلال الفترة دي ، دا طبعا لل عايز يقدم و يستعد و لو مش هتقدم و تعرف حد مهتم قول ليه لأنها فرصه كويسه جدا جدا و مش بتتكرر غير مرة ف السنه  🎉

ف فالبوست دا هحاول اجمع أهم الحاجات عنها ...

يلا نبدا ، بس قبل ما تبدأ ما تعملش save للبوست و تركنه جنب أخواته و كمله للآخر لأن كل سطر ف معلومه هتفيدك ، و الموضوع يستحق تاخد من وقتك و تقرأه 😁

منحه ال ITI هي منحه مقدمه من وزارة الاتصالات بالتعاون مع معهد تكنولوجيا المعلومات ..

المنحه مدتها 9 شهور ، و هي واحدة من ضمن تالت منح مقدمه من وزارة الاتصالات (ITI , NTI , NTL )

معهد ال ITI موجود في كذا محافظه و كل محافظه فيها عدد معين من التراكات

1-القرية الذكيه و فيها أغلب التراكس 26 tracks

2-الإسماعيليه و فيها 4 tracks 

3-الاسكندرية و فيها 4 tracks 

4-المنصوره و فيها 2 tracks 

5- اسيوط و فيها 1track

6-مدينه نصر و فيها 3 tracks 

ف الصور هتلاقوا اسماء تراكس كل محافظه  😁

للملاحظة بس عشان لو حد فاكر ال التراكس كلها تكنولوجيا و كدا ، ففي تراكات للتصميم animation ,3D و كذا حاجه كمان ، ف افتحوا الصور و الموقع الله يكرمكم و شوفوا كل حاجه بتأني كدا و دوسوا ع كل تراك و أقرأه تفاصيله ، هتكون مكتوبه بالانجلش و في اخر البوست هسيب مصدر نقرأ منه بيشرحهم بالعربي و دا لينك التراكس ع الموقع 👇

http://iti.gov.eg/Admission/PTPprogram/intake40...

- طيب هتقولي إسكوز ميي أنا هستفيد أي ، معلش اصل إحنا مش بنمشي غير بالمصلحة من أيام ابتدائي 😂

= أكيد هقولك حاجات كتير منها منحه مجانيه من أقوي المنح المجانيه ع مستوي الشرق الأوسط + إنك هتاخد مرتب كل شهر ابسط ي عم و دا طبعا ع حسب تقدير الكليه بتاعك 😌😂 من 800 : 1400 جنيه + مواصلات للمعهد مجاني ( قيل لي ذلك مش متأكدة من دي صراحه ) + أن المنحه دي تعتبر ك دبلومه تأهيل للماجستير و عشان كدا لازم أثناء دراستك تجهز و تاخد TOEFL or IELTS عشان تقدر تكمل ماستر برة لو حابب ، و أكيد أنا و أنت و ناهد و كلنا حاابين ، عاااماار ي مااسر 😂😂

- طب مين يقدر يقدم ؟!

= أقولك أي حد أهم حاجه يكون خريج و عنده شغف يتعلم و يتمرمط ، اه أصلك هتتمرمط 😁😂 

و تقديرك ميقلش عن جيد ( معنديش فكرة الصراحه لو تقديرك أقل من كدا موقفك اي ، بس من رأيي المتواضع قدم بردة و لو ليك نصيب هتتقبل بأمر الله ، اسعي بس 💪 )

-طيب دلوقتي هتقولي طب التقديم عامل إزاي و أعمل أي ؟!   

= أقولك ي سيدي التقديم بيفتح ف نص أو أول شهر سبعه و الفلترة و القبول كمرحله أولي بتكون ف شهر تسعه ( و دا بردة العادي ال بيحصل كل السنه فالله اعلم اي ال هيحصل خلال تلك الظروف )

بتقدم من علي الموقع و المتطلبات بتنزل ع الموقع بردة و منها صورة البطاقه ، شهادة الميلاد ، شهادة التخرج إن كنا هنتخرج ف سنتنا دي 😂 ، و إعفاء الجيش للشباب ، و طبعا لو شهادة التخرج او إعفاء الجيش اتأخرت ف بتمضي إقرار بتسلمهم ف حال قبولك ف معاد هما بيحددوا و بترفع بيان ناجح من الكليه بشكل مؤقت ، ف عليك و علي أستاذة عفاااف 😂

- بعد ما بتتقبل مرحله أولي بيحصل أي بقي ؟!

= هقولك ي سيدي ، بيحصل معاك 2 interview 

 واحد Iq + English  بيكون ع كمبيوتر هناك ، و التاني بيكون soft skills +technical بيكون كلام مع ال HR أو يطلب منك ع صفحتك ع الموقع إنك تصمم تاسك معين و تجيبه يوم الانترفيو و دا بيختلف من تراك للتاني ، و بعدها لو اتقبلت ف المرحله دي بيعتبر عديت 80% و ناقص آخر انترفيو و دا شويه دردشه كدا بس بردة مهم جدا ، مش هنخيب ع الآخر هااا 😂😒

- السؤال ال مهم تسأله دلوقتي بقي ، هروح كدا أبيض ي فل ولا أعمل إيش 👀

= اقولك ( أنا قلت كتير انهاردة بس معلاااش خليهااا عليك 😁) 

 أكيد طبعا مش هينفع وسط الحيتان ( اه حيتان عشان حياة بعد التخرج مش مسكرة و بسمسم 🥺😂) ال هتقبلها بعد ما تتخرج ف سوق العمل إنك تروح ابيض ي ورد كدا ، عشان كدا كل امتحان من دول لي مصدر نذاكر منه ، و دا طبعا عشان تضمن فرصه قبول كبيرة و خصوووصااا إن عدد المتقدمين مش هينّ أبداااا نهااائي 

- المصادر ال نبدا نقرأ (أو نذاكر منها )ع حسب ما تحب سميها 😁🤷

= هقولك قبل ما تبدأ تذاكر إنضم لجروب  Iti Bl3raby و أنا لقيته من أفضل الجروبات ال عليها ناس متفاعله و بيساعدوا و يردوا ع بعض ، و دا لينك الجروب 👇

https://www.facebook.com/groups/1441788029312302/

المصادر بقي :- 

- إزاي تستعد للمنحه و مقابلاتها 👇

https://bit.ly/2yvd7Ev

- ماتريال IQ و ال بنذاكر منه اول 26 set من  كتاب 501 و اول 10 set من كتاب ultimate + فيديو بيشرح طريقه الاسأله و حلها ، كل دا هتلاقوا متوضح ف اللينك دا 👇

https://bit.ly/2zgoFeV

تعديل 1 :

كتاب advanced iq  (مهم جدا جه منه اغلب الامتحان لدفعه 41 ال انا منهم حاليا 😅 ) 

https://drive.google.com/.../1Jytyg0Wahn71HgLeASa.../view...

- ماتريال الإنجلش و فيديوهات شرح لطريقه الاسأله هنا 👇

https://bit.ly/3cBtaz3

- ماتريال الأسأله المتكررة ف ال soft skills + technical هنا 👇

https://bit.ly/3bu1HiS

- وصف كل تراك باللغه العربيه و كيفيه الاستعداد لكل تراك من هنا 👇

https://bit.ly/2WtaQBQ

شويه نصايح على السريع كدا من وجهه نظري^^! 

- بخصوص الجزء التكنيكال فحاول تبدأ تشوف أنت ميال ل أنهي تراك و أبدأ ذاكر في من دلوقتي ، مش شرط تروح لهم تنين مجنح ف المجال لأ ، بس ع الأقل عارف عن المجال ال مقدم عليه ، علشان في كتير مقدم فلازم يكون في شئ يميزك بينهم و دور ع جروب الفيس بتاع التراك بتاع السنه اللي فاتت و ادخله اكيد هتلاقي أسأله و ناس هناك عندها خلفيه ف التراك دا اكتر  👌

- بخصوص  ال IQ +English حاول تبدأ فيهم و لو قرأه بشكل بسيط 

- أهم نصيحه بقي لو في حد تعرفه هيقدم و تعرف أنه حد محفز و هيجرك من رجلك ف دوس معاه و شجعوا بعض ، و لو مفيش و هتحس مجرد احساس أنه مطنش و مش عنده نفس شغفك و طاقتك ف دوس لوحدك و متستناش حد عشان حقيقي لو مش ساعدت نفسك محدش هيساعدك و لو فضلت منتظر حد يشدك الوقت هيمر و أنت مكانك ، ف شد نفسك بنفسك و متحاولش تساعد حد هو مش عايز يساعد نفسه أصلا لأنك هتكون بتحرق جاز ع الفاضي ، جشطا جشطا 😁

- و اخيرا بقي ، اعمل ال عليك و بس و أستعين بالله و أقدم و لو فيها خير ليك ربنا هيرزقك بيها و لو مفيهاش مش هتكون نهااايه العالم ، الحياة كدا كدا مش هتوقف علي حاجه ، ف أبدا أجهز لحياتك بعد التخرج و جهز ال CV بتاعك و ظبط LinkedIn بتاعك ( و كنت بفكر أعمل سيشن بسيطه ب معرفتي البسيطه فيهم للمحتاج يظبطهم يعني ) و لو مفيش حاجه تكتبها فيهم أبدا دوس و خد كورسات أون لاين ف ال بتحبه و جرب و متخافش بس اتقل فترة ف المجال ال بتجربه 🥱 ، و أظن الفترة اللي فاتت مكنش في اكتر من بوستات الكورسات الاون لاين ، دا كان ناقص يطلعوا ف أحلامنا و يكش اتلحلحنا و خدنا حاجه لا بس قاعدين نعمل save 😂

لو وصلت لهنا ف عاااش و الله ينور و شاااابووا لييك عشان أنت حد بيغتنم أي فرصه تحسن منه و كافئ نفسك و جيب لها مصاصه عشان بحبها و عشان تخلي السعادة تزورك 😋😌🎉

و أي لينكات هلاقيها مهمه هضيفها ف الكومنتات عشان البوست مش يطول اكتر من كدا  و أي جديد هيضاف بردة ع البوست أو الكومنتات ، و لو في أي حد عنده أضافه أو خبرة سابقه يقدر يشارك بيها أكيد ، و البوست كان نتيجه بحث الفترة ال فاتت عن المنحه و متطلباتها فهو اجتهاد ليس إلا .

و طبعا لو حابب تفيد غيرك و أنا عارفه انك حابب ف أعمل شير للبوست ، و منشن للناس المهتم 🎉🎈

و اذكرونا بدعوة ي طيبين 🤍