البيبي بيعيط # جميع اسباب بكاء الطفل

 مش كل العياط جوع...   

---   

--

1) جعان...  

2) عطشان... هترضعيه برده، كمية المياه في لبنك بتزيد في أوقات الحر.. حاجة كده custom made

3) سقعان... وده نادرًا ما بيحصل، عشان إحنا عندنا قناعة ال over-wrapping ... أنا في شغلي بأخد وقت في فك طبقات الهدوم من جسم البيبي أكتر من وقت الكشف نفسه 😀 بس فيه ملاحظة: في الجو المتقلب ممكن امبارح يبقي حر فتلبسي البيبي نص كم، ويجي النهارده يبقي سقعة فتتخيلي انك لو لبستيه نص كم يبقي كده لخبطتي له في اللبس وهيعيي.. لأ حضرتك تلبسيه حسب الجو المحيط .. مش لازم يقضي مدة معينة في النص كم قبل ما يحول للكم.. 😀 

4) حرّان... جاري فك الطبقات المتراكمة  اللي لسه قايل لكم عليها 😑 القاعدة مبدئيا بتقول ان الطفل يلبس اتقل منك بطبقة واحدة... بس في الصيف والحر متعمليش فيه كده أرجوكي

5) زهقان... أيوه حد يقوم يتشقلب يللا ولا شوفوا لنا حاجة عدلة نتفرج عليها.. أنا هأفضل قاعد في السرير كده وباصص للسقف وانتو قاعدين ساكتين؟؟ شوية أكشن لو سمحتم.. حد يلاغيني! ((خصوصًا لو بنت))

6) مصدّع... كفاية دوشة بقي... انتو على طول لوك لوك لوك كده... بطلوا رغي شوية بقي وعايز أسمع الصمت ((خصوصًا لو ولد))

7) عايز يغير البامبرز.. نسيناها إزاي دي؟ 😀 

😎 فيه فتلة من الشراب لافة على صوباع رجلي الصغنن... فيه شعراية من شعر ماما لافة على صوباع ايدي الشمال... فيه تيكت من الهدوم الداخلية بيشوكني في قفايا... فيه نملة قرصتني ورا وداني... 

(غيري ملابسه تماما وتفحصي كل سنتي من جسمه.. ده إجراء روتيني لازم يتعمل يوميًا حتى لو مش بيعيط.. ولازم يتعمل لو دخلنا في نوبة عياط ومش عارفين سببها، للأسف الموضوع ده متكرر وساعات كتير بيعمل إصابات فعلية في أصابع الأطفال بالذات وممكن شعرة تلف عليه وتعمل غرغرينة عشان احنا مصممين منقلعوش الشراب عشان الجو سقعة وكأن بكتريا الالتهاب الرئوي قاعدة مستنية تدخل من صوباع رجله الصغير -_-)

9) التهابات في منطقة البامبرز.. حدّث ولا حرج، ببساطة شديدة: شطفيه بمياه عادية من غير صابون 

معظم الالتهابات بتتحسن أو بتختفي تماما بالطريقة دي، وقليل لما بيكون فيه تدخل تاني محتاج عرض طبي

10) عنده مغص... Infantile colic ... ده أوبشن كده نازل built-in  في الأطفال أول 3 شهور وممكن يكمل... عادة مش بتكون مشكلة عضوية، خصوصًا المغص اللي بيجي بعد العصر كده وبالليل ولحد الفجر... بس فيه علامات معينة لازم عندها نروح لطبيب أطفال: سخونية، إسهال شديد، ترجيع مستمر وعنيف، وضع الطفل على منحنى النمو غير مطمئن

ببساطة جربي تحطي طفلك في وضع رأسي وتكرعيه، أو تنيميه على فخذك وتدلكي ضهره، أو تنيميه على ضهره وتدلكي بطنه وتحركي رجليه كإنه بيعمل تمرين العجلة، وممكن تشليه وضهره ملاصق لبطنك ودراعك ضاغط على بطنه ضغطه خفيفة

11) النور ساطع بزيادة في الأوضة... (صدق أو لاتصدق: الأربع لمبات نيون اللي ضاربين في عينه دول مش بيقللوا الصفرا... آه والله... لو رقم الصفرا زايد جدًا الطفل بيتحجز في الحضانة ويتعرض لنور مختلف بطول موجي معين، ومش هو خالص الطول الموجي بتاع اللمبة النيون ولا الموفرة للطاقة ولا حتى الصفرا التنجستين دي... وبنت خالتك اللي حطت ابنها تحت اللمبات دي وصفرته قلت بعد يومين، فهي كده كده كانت هتقل بعد يومين وملهاش علاقة باللمبة... اشتري مني يا بنت الحلال واطفي النور ونامي)

12) الدنيا ضلمة بزيادة.. متطفيش أوي كده... بالنهار اقفل الشباك نص قفلة ونزلي ستارة، وبالليلة نوري لمبة سهّاري أو نور خارج الاوضة اللي بتناموا فيها... عايزين إضاءة شاعرية حالمة عشان نعرف نستكنيص وننام... معلش معلش، لما يكبر ابقي صفي حسابك معاه 😀 

13) عايز اتمرجح... دلكي لي رجلي.. طرقعي لي ضهري... اهرشيلي في الحتة اللي فوق دي... (اهدي معلش، قلنا هنصف حسابنا لما يكبر 😀 وده زي ابنك برده 😀  )

14) انتى وشك عامل كده ليه يا ماما؟ اضحكي لو سمحتي

صدق أو لا تصدق برده: البيبي بيحس بيكي من وهو في بطنك، تتخيلي مش هيحس بيكي بعد ما شافك وسمعك ولمسك؟!

15) ريحة غريبة... بخور، برفان، معطر، عرق، كشط/ترجيع، حاجات تانية...😀 

16) عايز أعيط... إيه معترضة على ايه؟! مش انت كمان عايزة تعيطي بذمتك؟! خديه في حضنك وكلميه وطيبي خاطره

17) أنا مش عاجبني الجو هنا وعايز أرجع جوه تاني... إحنا متفقناش على كده. بيئة الرحم الل اتعود عليها وبعدين لقى نفسه في معطيات تانية خالص... 

18) أنا زهقان وعايز أتفسح.. فسحوني ((تمشية بالعربية في جو لطيف، يحس بنسمة هوا جديدة على وشه وصوت عصافير ويا سلام لو فيه ريحة بحر... طمع آه أنا عارفة، لسه هو هيكتشف ده بعدين، بلاش نحجم طموحات الأطفال من دلوقتى، هي هتتحجم لوحدها  😀  ))

19) إيه اللخبطة والحاجات الكتير دي، أنا عايز أرجع البيت... روحوني ((المولات.. والشوبينج... والهايبرماركت... أنا عارفة إن الأمر لا يسلم وهنضطر نتواجد هناك... بس انتى لو وقفتي في وسط المول وغمضتي عنيكي دقيقة، دماغك هتضرب... زحمة واصوات كتير وصدى صوت وسقف عالي... حاولي البيبي ميعديش على تجربة زي دي ولو مضطرة يبقي نشتري الاساسيات بسرعة ونمشي... ليه هيجي وقت للشوبينج كتير بعدين إن شاء الله))

20) هو بابا فين؟!

فيه لمسة سحرية للأب والعم والخال في تهدئة الأطفال في الشهور الأولى.. متعرفيش بقي عشان هدهدتم ليه أقوى شوية وأثبت من دراعات الأم الهلكانة ومش عارفة تنام... ولا عشان ايدهم اقوى فبيعملوا مساج أعمق.. ولا عشان صوتهم low pitch  فمش بيعمل توتر مقارنة بصوت تيتة خالتو وعمتو (مع احترامي لأدوار الجميع والله لا غنى عنكم طبعًا)... ولا عشان هما مش متواجدين بالكثافة المطلوبة -خصوصاً الأب- فببساطة البيبي بتعيط عشان بابا وحشها! 

المهم إنها مصلحة.. نادي بابا وقولي له خد كلم حد عايزك 😀 

21) هو النهار خلص؟ طب أنا هاروح أعيط شوية وآجي.. Evening fussiness 

اللهم لا اعتراض... بس هي حقيقة، قريفة المساء والسهرة... 

استعيني بالSkin-to-skin and swaddling 

22) زحمة الضيوف... الناس اللي بتيجي تبارك وتهني... لا تخجلي من إنك تنسحبي عشان تهدي طفلك، الناس هتتفهم متقلقيش

23) عايز أنام... ( طب ما تنام؟! 😀  )

24) فيه وضعية معينة بتوجعني... (اتأكدي إن راسه مفيهاش إصابة من الولادة cephalhematoma .. وأطرافه الأربعة بتتحرك تمام.. ولما بيريح على مفصل الفخذ مش بيتألم.. رقبته مش ملووحة ومفيهاش عضلة متقلصة congenital torticollis ... أو أي وضعة بتلاحظي إنها مؤلمة ليه عن غيرها... كل دول محتاجين فحص طبي)

25) التهاب أذن وسطى... خصوصًا لو ظهر سخونية (مش لازم تبقي عالية جدًا ومولع نار)... طبعًا دي حاجة مش واردة أوي في أول 6 شهور لو الطفل بيرضع رضاعة طبيعية مطلقة من غير أي مكملات ولا أعشاب، لإن الطفل ده مناعته بتبقي عالية جدًا .. بس طبعًا يبقى احتمال وارد كل ما الطفل كبر وخصوصًا لو كنا اديناله أي حاجة غير لبن الأم

26) خد ببرونة ، واستسهلها... خد تيتينة ولخبطت له طرقة رضعاته الطبيعية فمش عارف ينزل لبن من ثديك.. كل ده اسمه التباس الحلمة  nipple confusion ... 

27) بيشرق.. اللبن بينزل كتير ومش عارف يبلع ويتحكم فيه... بتحصل عادة بعد أول أسبوعين من الولادة وممكن تفضل شوية كمان بعد كده.. حلها ببساطة انك تعصري ثديك قبل الرضعة لحد ما الاندفاع ده يخلص وضغط الثدي يقل قبل ما اليبي يرضع.. وتحتفظي باللبن اللي عصرتيه مش ترميه عشان ممكن تحتاجيه تاني 

28) طفرة نمو.. growth spurt ... مرحلة كده عادة بتبيجي مع الأسبوع السادس والشهر التالت وغيرهم، بيجي للطفل جوع مطول ومستمر. كل اللي بيبلعه بيهضمه وعايز تاني... ممكن يقعد يوم كامل مبيعملش غير انه يرضع .. بنسميها cluster feeding.. ودي حاجة كويسة مش وحشة ومؤقتة لا تقلقي.. 

29) كنتي بتقطعي فلفل حراق وبعدين حطيتي ايدك على وشه

30) حد زعق فيه.. حاولنا إقحام الثدي في فمه بالعافية عشان يسكت.. حد ضربه... ((آه بتحصل، وفي أطفال من عمر يوم)) فيه حاجة اسمها nursing strike ... لما الطفل يتعرض لصدمة نفسية عنيفة سواء من أمه أو أي حد تاني.. ممكن يدخل في إضراب عن الرضاعة... وعياط هيستيري لو بس قربتيه من ثديك، ولو اتشقلبنا قدامه لا هيسكت ولا هيرضع... 

طيب ده حله إيه؟! حله إن ده ميحصلش... أنا عارفة إن الفترة طبعًا صعبة ومرهقة عصبية وقلة النوم بتبوظ الدماغ... بس اللي قدامك ده بنى آدم، مش مخدة فش الغل... اطلبي مساعدة ودعم من كل اللي حواليكي، لو حسيتي إنك بتشكلي خطر على طفلك؛ اطلبي مساعدة من طبيبي نفسي متخصص...

في حالة إن البيبي اتعرض لده، هنحتاج مساعدة من استشاري رضعة طبيعية في تصليح الوضع والحفاظ على لبنك لحد ما نصالحه ونقنعه إن محدش هيعمل له كده تاني

تبقي حاجة أخيرة مش هنحط لها رقم... لاٌنها قليلة الحدوث فعلاً... وهي إن  لبنك يكون فعلاً قليل...low milk supply 

في 99% من الحالات بيبقي perceived low milk supply...  يعني الأم متخيلة كده بس ده مش حقيقي، واللي يفصل في ده استشاري رضاعة طبيعية بعد فحص ومناظرة ومتابعة للأم والطفل... وليها الف حل وحل قبل ما نفكر مجرد تفكير ندخل رضعةصناعي .