للأرقام في العامية المصرية استخدامات مختلفة ومحددة جدا

 للأرقام في العامية المصرية استخدامات مختلفة ومحددة جدا.

وعلى سبيل المثال:

- يستخدم رقم (٦٠) فقط وحصريا في الشتيمة، زي (ابن "٦٠" كلب).. ومفيش حاجة ابدا اسمها (ابن "٥٠" كلب) ولا (ابن "٧٠" كلب)

هما ٦٠ لا اكثر ولا أقل .

اما لو حد بشع جدا بقي وعايزين نضاعفله الشتيمة اضعاف كتيرة، فبنعمل ايه؟ 

بنجيب ال٦٠ بتاعتنا عاااادي ونضربها في ٧٠!

(ابن ٦٠*٧٠).. وبالهنا والشفا.

ويستخدم رقم (٦٠) بردو لوصف اسوأ مكان او وجهة فتقول:

(اهو غار في "٦٠" داهية).. وعمر ما حد غار في ٨٠ داهية مثلا ابدا! ماحصلتش!

-ويستخدم رقم (٣٠) حصريا لوصف شخص او شيء عديم المنفعة..

( ده واد مالهوش "٣٠" لزمة)

(خرجت خروجة مالهاش "٣٠" لزمة)

والملفت للنظر، ان مفيش اي حاجة في الدنيا اصلا ليها 30 لازمة.

-وتستخدم في العامية (١٠٠ ١٠٠) لوصف الحالة الجيدة.

(انا تمام يا معلم الحمد لله وكله "١٠٠ ١٠٠")

او (آكل ايه تاني؟ انا كده "١٠٠ ١٠٠") 

-اما (١٠ على١٠) فتستخدم لوصف جودة الاشياء..

(شوية شاي"١٠ علي ١٠")

-ويستخدم رقم (١٠٠٠) تحديدا في مناسبات ثابتة.

-في المباركة.. (١٠٠٠ مبروك).. مفيش ١٠٠ مبروك مثلا!

-في الاحتفال(١٠٠٠ نهار ابيض).. بردو مفيش (١٠ نهارات بيض) مثلا، ولا حتي(مليون نهار ابيض).. هما ألف في كل حتة! 

-في الترحاب.. (١٠٠٠ خطوة عزيزة).. ودي بالنسبة لي جملة مبهمة جدا!يعني (دي خطوة عزيزة) بمعني انها زيارة نادرة الحدوث! انما (دي ١٠٠٠ خطوة عزيزة) يعني ألف زيارة نادرة الحدوث ازاااي؟؟؟

-وطبعا لما نحب نشكر حد، بنشكره(١٠٠٠ شكر) بالعدد!

-ويستخدم رقم (٧) في وصف حاجة غريبة جدا، وهي اللوصة او الانهاك المحير.

(ده انا دوخت ال(٧) دوخات لحد ما لقيتك!)

-كما يستخدم رقم (٧) للتعبير عن النوم العميق.! 

(ده شكله رايح في "سابع" نومة)..على اساس انه لو في سادس نومة كان قام عادي

-الشاي بيبقي في الخمسينة! اي ٥٠٪؜ من الحجم المعتاد! نص كوباية يعني بالمللي!

-أما الرقم ( ٥).. فهو وحدة قياس فضفاضة جدا، وتعني في العامية المصرية (خمس دقايق)، وتستخدم في وصف الانتظار احيانا.. (استناني (٥)

او في وصف حوار سريع..

(هاكلمك (٥)..

او لوصف الاستراحة..

(اقعد (٥) بس خد نفسك)

-في وصف الوقت.. الثانية بتبقي (واحدة)..

(ثانية "واحدة" بس البس الجزمة وانزللك)

بس الدقيقة تحتمل (١) و(٢) و(٣)..

(دقيقة "واحدة" وهابقي معاك)...

او.. 

(اديني "دقيقتين" وهابقي معاك)..

او..

(انا هاشرحلك كل حاجة بالظبط في "٣" دقايق)

-واطول مدة زمنية في الكون هي (الساعتين الاتنين)..

(قعدت تحكي لي "ساعتين" عن ابنها اللي بدأ يسنن !)

بينما اقصر كلام هو اللي يتقال في (كلمتين اتنين)-

(هما "كلمتين" ورد غطاهم)

-الشخص المحتاس ده بقي اللي تلاقيه قاعد (يضرب اخماس في اسداس)..

ودي بالنسبة لي عملية معقدة جدا جدا.-واللي مالوش عند حد حاجة.. محدش يقدر يقول له (تلت التلاتة كام؟)

اللي هو (١) عادي!

محدش يقدر يقول له (١) ليه مش فاهم؟