وانت بتشتري شاشة هتسمع فرز أول وثاني وثالث .. ازاي انت تفرز بنفسك وتخرج العيوب سواء كانت ( ديفوهات ) أو scratches ركز معايا في الخطوات

 غالباً وانت بتشتري شاشة هتسمع فرز أول وثاني وثالث .. ازاي انت تفرز بنفسك وتخرج العيوب سواء كانت ( ديفوهات ) أو scratches ركز معايا في الخطوات :

* ما تخليش اللي بيعرض عليك الشاشة يشغل ويندوز بقى ويقعد يقولك يا الله شوف الألوان شوف الجمال شنو هادا الاحمر والاخضر والفوشيا :D  سيبك افتح انت اي شاشة بيضا حتى لو برنامج نوت باد أو الرسام دول اكثر حاجة هتظهرلك عيوب الفرز وخصوصا الديفوهات

 

* ركز في بعض البقع السودا اللي ممكن يخيل اليك من النظرة الأولى انها وسخ ع الشاشة أو تراب امسحه كويس وشوف هو ثابت ولا لا

* ركز بقى اذا لقيت بقعة خفيفه خالص ومفيش هالة مضيئة حولها أو الوان من منتصفها ممكن تقبلها على انها فرز تاني خفيف عادي لكن بينزل من سعر الشاشة 50 جنيه 

* التجريح الخفيف scratches حسب طول وحجم التجريحة دي بتخرج الشاشة لفرز ثالث لو زيادة شوية بينزل من سعر الشاشة أكتر من 120 جنيه 

* خط بطول أو عرض الشاشة متقبلوش لأنه غالباً في المستقبل هيفرش ومش هتلاقي له علاج ولا حتى عند العطار ومحدش عارف المستقبل ده القريب ولا البعيد 

* الشاشات الاستيراد عموما أفضلهم Dell وبعده HP والميكسات بقى NEC أو Samsung أو غيرهم بيبقى سعرهم أقل من Dell و  HP 

* شيّك ع الاضاءة بتاع الشاشة لا تقبلها باهتة قوي ولا فاقعة الألوان تسر الناظرين لازم يكون الـLED فيها مقبول وخاضع للزيادة والنقصان 

* جسم الشاشة الخارجي الـ Body لو كان فيه أي مشاكل أو تجريح أو كسور بيأثر على فرز الشاشة وبتعرف كمية الطحن اللي كانت عايشة فيه وربنا نجاها من ايد مالكها الاول عشان تيجي لايدك الحونينة :D بلاش بقى حتة أهم حاجة الشاشة من جوا والكلام ده الجسم الخارجي مهم ممكن تقبل فيه خدوش بسيطة لكن كسر وشروخ بلاش 

******************

مثال لعيب شاشة بسيط في الصورة اللي البيضا اللي تحت ممكن تقبله اما الصورة السودا بلاش تقبل العيب ده ... ويستحسن يعني تخليك في اللي يخدمك في فرز أول حتى لو هتدفع 50 جنيه زيادة وتاخد شاشة مفيهاش أي عيوب