شابوو للأمهات بقي.. اللي بيعملوا ارجوزات و بيطبخوا و يأكلوا و يلعبوا و يحموا و يبقوا هيقعوا من التعب بس كل ده علي قلبهم زي العسل

 # مراتك نيمت الولاد..

* اه..

# هايل..

* بس باصه في السقف و متنحه و انا قلقان عليها..

# لأ ما تخافش..

* بس من ساعه ما ناموا و هي ما فتحتش بقها بقالها ساعتين..عادي يعني كده؟

# ايوه يا بني..برضه ما تقلقش..

هي بس بتمر بأعراض الفوقان من الصدمه..

كأن مثلا حد كان مشغل التلفزيون بعد الارسال ما خلص اللي هو صوت الوششششششش ده علي أعلي فوليم و فجأه قفلوا التلفزيون..

بيني و بينك اللي شافته طول اليوم مع العيال مش شويه..

الولاد بتصحي من 9 الصبح مش بيناموا الا واحده بالليل..

كل ده

بتأكل و تشرب و تحمي و تلبس و تقلع و تغسل و تنشر و تحمي تاني..

مراتك حكت حكايه سوبر مان 30 مره عشان ابنك بيحبها..هي هي بنفس التفاصيل..و بنفس الانبهار..و لبستله فوطة الحمام علي ضهرها عشان تطير و ما يزعلش!!

و جريت ورا بنتك الشقه كلها كعب داير عشان تحلق عليها و تأكلها..

مسحت الارض 20 مره عشان اللي وقع منه عصير و اللي دلق المياه غصب عنه و اللي ما صدق و اتزحلق..

بتجاهد كل مرة لحد ما تنيم طفل معندوش ادني استعداد للنوم مع انه مشغل سارينه الزن و نفسه ينام بس اهو غلاسه كده..

بتدور علي التيتينه اللي بنتك رمتها في الزباله و عايزاها عشان عايزه تنام..

بتمشي تلم فتافيت الأرض فتفوته فتفوته عشان بنتك بتشفطهم و لا أجدعها مكنسه..

بتجيب الريموت اللي اترمي ورا السرير و بتطبق اطنان الغسيل بتاعة ولادك اللي كل ما

ياكلوا حاجة يوقعوها كأن ايدهم مخرومة..

ابنك لما يفتح باب الحمام بتجري تقفله لحسن الاخطبوط الصغير يدخل ايده في البلاعه و ممكن راسه كمان..

بتدخل ده الحمام و تغير لدي البامبرز..

و هي بتطبخ عينها في وسط راسها لحسن حد يتخبط او يكسر حاجه..

عايشة مع خلفية متواصلة من الزن و الرغي و الطلبات اللي مش بتخلص..

بتسمع كلمة ماما 500 مرة و عايز 1000 كده و المفروض تمسك أعصابها و تبقي هادية و بتضحك و بتلاعب و بتدلع...

بتحل في نزاعات غلسه و اشتباكات غتيته بين طفلين سابوا 200 لعبهة و حبكت يلعبوا بلعبة واحدة في نفس اللحظه..كل واحد لو يطول يجيب التاني من زوره هيجيبه..

بتسايس في ده عشان يسمع كلامها و تحايل في دي عشان تسيب شعرها اللي قطعته في ايدها..

بتقنع بنتك ان الكلينكس مش بيتاكل و بتطلع الورق من بقها بأعجوبه..

بتلم اللعب بتاعتهم معاهم 40 مرة عشان تعلمهم التعاون و يساعدوا بعض ازاي..

بتعقم ببرونات و تحضر لكل واحد أكله و تضحك معاهم و تلعب و تعمل حصان و تقلد صوت البطة عشان ولادك يضحكوا نص ضحكة..و دي عندها بالدنيا كلها..

بتشوف معاهم الكرتون اللي بيحبوه و حفظت أساميهم أكتر منهم عشان تشاركهم كل حاجة و يحسوا انها قدهم..

عرفت هي في كوكب تاني ليه و مش موجوده في الوجود لما ناموا؟ 

هي ساكته و متنحه عشان هنجت..

الفيوزات ضربت، 

و هيحصل احلال و تجديد للفيوزات دي خلال ساعتين الهدوء دول عشان تبدأ المعجنه من جديد كمان كام ساعه..

عايزة تفصل من الزن و الصداع اللي عاشتهم،، انت لما بيجيلك تليفون شغل طويل شوية بتتخنق شوف بقي هي مصدعة ازاي من رغي عيال بيتفهم بالعافية و ساعات كتير هي الوحيدة اللي بتفك شفرته ☺

..