الجيل الل ودانا في دهية

 جيل السبعينات وأول الثمانينات هو اكثر جيل مظلوم..

جيل لا هو عارف يعيش شاب ولا عجوز !!

جيل لا قادر ينسى شرايط عمرو دياب وعلاء عبد الخالق ولا يستعمل سيديهات المهرجانات..

جيل لا قادر ينسى لمة العيلة وسهرة الام و الجدة والخالة وريحة الكحك اللى قاعدين ينقشوه بايديهم والفرحة والضحكة والبهجة ولمة ولاد الخال والعم....ودخلتك عليهم دلوقتى وانت متخشب ومحتار تجيبلهم الكحك بتاع لابوار اللى ب٥٠٠ جنيه ولا شكلك حيبقى وحش لو مجبتش الكحك ابو ٦٠٠٠ جنيه ابو شكل حلو ودم تقيل!!

وياريتك حاسس بالعيد...

جيل لا عارف يعيش على الأصول والمبادىء اللى اتربى عليها ...ولا يفك ويكبر ويروق الجماجم..

جيل مش عارف يساير أولاده..لأنه لسة حاسس أنه واحد من اولاده ..مظلوم!!! 

جيل برىء...

جيل مش عارف يتعرى ولا يتغطى .. يلبس المقطع ولا ميصحش....جيل لسه امه بتقوله عييييب وأبوه بيبرقله فيخاف!!!

جيل كان أقصى فرحته لمة المعمورة ولعب الراكت على الرملة وسط الشماسى... لكن دلوقتى فلل وقصور فى مراسى وأدوية الإكتئاب والمهدئات جنبهم على الكراسى!!

جيل معظمه بعد ما كمل سن العشرين قاعد متفرج .. مخضوض!! نظرة عينيه دائما بين علامات الاستفهام والتعجب...

الجيل بتاع ليالى الحلمية "ومتسرسبيش يا سنينا من بين أيدينا....متسرسبيش دة احنا يادوب ابتدينا "...

و فجاء السنين اتسرسبت

جيل الفجأة والمفاجأة.!!!!