😅😅😅😅
= بقولك إيه .. عايزاك تكلم الويدينج بلانر إنهارده تحجز معاها ضروي
- أكلم مين ؟
= الويدينج بلانر
- أيوة سمعت الإسم .. عبارة عن إيه دي ؟!
= دي اللى هتظبطلنا الفرح
- رقاصه يعني ولا هتظبطهولنا فى إيه مش فاهم
= دي اللى هتعمل خطه للفرح وتعملنا كروت الفرح وتنفخلنا بلالين جنب الكوشة وتظبط مواعيد الفقرات وكل الليله دي
- م .. م .. مش عارف يعني ايه .. بتاخد كام دي
= مش عارفه .. عشره خمستاشر
- جنيه ؟
= ألف
- عشان هتنفخلنا بلالين ؟! .. ما صحابي موجودين ينفخولنا مناطيد نطير بيها لو طلبت .. يا حبيبتي سيبك من المسميات المتخلفة دي .. دي عالم ملقوش شغل فسموا نفسهم أى حاجة صدقيني
= هو ايه اللى أي حاجة ؟! .. ما كل الناس بتجيبها
- تبقي كل الناس هبلة .. أنا مالي بالناس .. تقدري تقوليلي دي خريجة إيه ؟! .. درست إيه ؟! .. أنهي جامعه دي مثلا إللي بتدرس للطلبة بتوعهم أفراح ؟!
= معرفش
- يبقي مفيش ميتين حاجة اسمها ويدينج زفت .. دي شغلانه صحاب العروسة والعريس بيعملوها مجاملات كده لبعضهم .. يرحبوا بالضيوف .. يفرقعوا صواريخ .. يوزعوا جاتوه .. يرقصوا ورايا .. طقوس معتاده عاديه مش محتاجة يعني
= والفوتوجرافر ؟
- هشام ؟
= هشام مين ؟! .. لا بوليكا
- بوليكا ده وصفه ولا اسمه ؟
= معرفش هما بيندهوله كده
- بياخد عشره خمستاشر مش كده ؟
= تقريبا
- عشان بيصور ؟! .. وهشام صاحبي اللى شاري كاميرا من عشر سنين ونازل تصوير فى الحشرات والجماد ووشوش الناس فى الشارع ده يهودي ؟
= لا
- ملحد ؟
= معرفش
- لما ييجي يدوس علي زرار الكاميرا .. الكاميرا بتقوله إنت مش بوليكا يسطا فمش هشتغل ؟
= أكيد لأ
- يبقي زفت هشام هيجيب كاميرته ويصورنا عادي جدا وهناخد منه فلوس عشان شغلناه بدل قاعدته فى البيت كمان .. ده غير ال18 ألف موبايل اللى هيبقوا كلهم شغالين فلاشات وتصوير طول الفرح .. يبقي ليه بوليكا ؟ ولا هي أى بوليكا وخلاص ؟
= أي بوليكا وخلاص
- يبقي مفيش بلاليك وبطلي فلاليك والنبي
= والكوافير فلاليك ؟
- أكبر فلاليك والله .. تخيلي واحده تيجي تاخد فلوس عشان تخليكي وحشة .. متخيلة ؟! .. واحده حافظة استامبتين تلاته بترسمهم علي وش أى مخلوقة تقع تحت إيدها .. تخلي العرايس كلها شكلها بلاستيك مش حقيقين ووشوشهم بتلمع وتقرف
= يعني أنا وحشة وأقرف ؟
- وانتي لو وحشة وتقرفي هتجوزك ليه ؟! .. غاوي عفانه ؟! .. أنا حبيتك كده وهتجوزك كده .. بوشك الحقيقي بشكلك الحقيقي .. مش محتاجين زخرفه والله اللى علي وشك ده جلد مش ورق إسكتش نرسم عليه
= أنا زهقت
- صدقيني كلها طقوس خايبه وناس مش لاقيه شغل فحاولوا يجاهدوا فى أى سكة وربنا معاهم مفيش مشكلة عندي .. بس شوية عقل كده هنكتشف إن كل ده روتين محفوظ بيتعمل بدون نص جنيه تفكير حتي
= يبقي نلغي القاعه بقي ونلغي الفرح ونلغي الزفه ويدوب أجيلك البيت في تاكس
- لو عليا والله هجيبك فى أوبر والله .. دنا لو حجزت بالفلوس دي 3 شهور عسل هنلف أدغال آسيا بأوروبا نقضيها ركوب أفيال وتأكيل أسود ونط فى أعماق المياه المالحة الشفافة وهيفيض كمان
= بجد ؟
- والله .. الحياة أبسط من التعقيدات اللى هنا دي كلها .. مجرد تفكير بسيط هنكتشف الحقيقة الصادمة دي
= فعلا
- إرجعي لعقلك كده وفكك من التقليد الأعمي وخليكي ذكية كده عشان حياتنا تبقي حلوة مع بعض
= حاضر
- ربنا يكملك بعقلك
= خد بقي رقم الويدينج بلانر أهو كلمها عشان مستنياك وعماله تنفخ بلالين من الصبح .. إحجزلنا قبل الزحمة
تعليقات
إرسال تعليق