أصحابي اللي إتجوزوا، أول أسبوع جواز بيختفوا تماما من عن النت

 أصحابي اللي إتجوزوا، أول أسبوع جواز بيختفوا تماما من عن النت .. طبيعي ومفهوم .. الفكره إنهم أول لما بيرجعوا، بيرجع ومعاه البوست بتاع عشرين سبب يخلوك تتجوز، أو عشرين نصيحه لجواز ناجح،

الله ! .. يعني بص البجاحه بتاعة الناس ..  يا ابني انت شفت ايه في الجواز عشان تقولنا نصايح في الجواز، أو تقولنا إتجوزوا طيب ؟ .. واحد بياكل بس .. بس بياكل .. وكل عشر دقايق بيتقاله الجمله بتاعة" أنا مش مستوعبه أن اللي اتنين في بيت واحد دلوقتي " أو "ربنا يديمك في حياتي" .. حماته بتبعت أكل.. أهله بيبعتوا فلوس .. صحابه بيبتعوا منشطات .. أبوه بيبعت رصيد .. وأخوه بييجي ياخد اللبس الوسخ ويبص له ويغمز ويقوله هي جوه؟ .. مراته علي طول حلوه .. بتضحك ..  متجدده .. مش متردده .. مودها حلو بس ..  مرفعه صوتها  .. مميله راسها وهي بتتكلم .. مش بتندهه بإسمه .. بتقوله يا بودي حتي لو إسمه عصمت أو يا بابا .. بتسأل دايما مبسوط يا محمد ؟ أو نفسك في إيه دلوقتي ؟ فبيرد الرد بتاع: هتصدقيني لو قلتلك إني خلاص خدت كل حاجه من الدنيا ؟ .. بس كده خلاص،

ف هو يا حبيب أبوه متخيل إن الإنسان هيفضل كده طول عمره .. ده العادي .. أنا مكمل كده .. متخيل إنه هيفضل يتعامل معاملة الشخص اللي فاضله شهر ويموت والناس بتنفذله رغباته دي .. ف أنا إزاي متجوزتش طول المده دي .. ف أدخل أقول للناس يا جدعان تعالوا دول عاملين عروض .. وأطرش بوستات بقي فوائد وخصائص ومميزات للجواز وأغيظ في إصحابي،

شهر ونص .. شهر ونص بالظبط .. الأكل بيبدأ يخلص .. حماته بتبدأ تقول لبنتها الحته بتاعه انا مش هعرف أجيلك اليومين دول عشان أبوكي عنده تمرين، طلعي تونه وشيبسي .. أبوه بيبدأ يقوله المصاريف زادت عليا، حاول تنزل من جنب الغندوره وتروح شغلك .. مراته بتبدأ متسرحش شعرها خلاص وتتكرع بصوت قدامه .. خلاص بقي، ما الحواجز وقعت ومحدش مهتم يبهر حد .. والحياة فجأه بتبدأ بقي تبقي عاديه خلاص .. حاجه زي قصة شعر مني الشاذلي .. فيبدأ يدرك هو أنا اللي أنا عملته ده .. إيه اللي أنا كنت بكتبه عالنت للناس ده .. فوائد عشرين إيه .. وييبدأ يشير بوستات "لما مراتك تقفشك وانت مع أصحابك عالقهوه" وبوستات المتجوزين الشقيه دي .. فتدخل هي تعمل لايك بس عالبوست من غير ريآكت .. اللي هو أنا شفت يعني .. وتبدأ هي بقي تكتب "يا رب هون" أو " لا والله ما يأست ولكنها أيام ثقال"، حاجه في السكه دي ،

ف يا شباب بعد إذن الناس بس ، بنكرر تاني .. بلاش حماس شركات ال Start up ده واتقل كده شهرين تلاته لحد ما تستوي وتخمر وتكون عرفت الدنيا فيها ايه، بعدين تعالي قولنا نصايح زي ما انت عايز .. بس مش من أول إسبوع كده .. إتقل كده وهات من قعر الحله وقلب كذا مره، لحد ما تتأكد، بعدين يا سيدي تعالي اعمل ايڤنتات لو حابب واحنا هنحضر مفيش مشكله والله.