لاعيب الكرة اللي بيلعب في نادي بيلعب عشان ياخد فلوس ولما بيقدم مستوى كويس بيرفعوا راتبه ولما عقده بيخلص بيعمل عقد بفلوس فعلا, تخيل

في معلومة المفترض إنها حاجة بديهية بس ميمنعش إننا نقولها🐸

 

لاعيب الكرة اللي بيلعب في نادي بيلعب عشان ياخد فلوس ولما بيقدم مستوى كويس بيرفعوا راتبه ولما عقده بيخلص بيعمل عقد بفلوس فعلا, تخيل؟! 🤔🤔

ممكن فريق كان كبير وعريق يفلس فميفدرش يشتري لاعيبة فخلاص بقى مبيقدرش يقدم كرة ممتعة فعلا، بس مازال اللاعيبة اللي موجودين لهم عقود وغالبا بيكسبوا ملايين ، بس في واحد بيخسر اللي هو أبو صرم اللي بيتنطط لما الفريق ده بيخسر وبيتحسر على الأمجاد وإزاي شوية المحدثين اللي معهم فلوس يكسبونا؟!🤑

أغلب الأندية لها أصحاب مش شرط أندية عامة، وصاحب النادي بيستثمر فيه عشان بكسب مش عشان يبسطك ولا عشان روح الفانلة أو أي سبب تاني وممكن يبيع النادي ده فعلا٫ أنا عارف أنك متخيل!🙄

ممكن الحكومة تصحى الصبح تخصخص أندية عامة والنادي بتاعك عادي يبقى صاحبه مستثمر خليجي أو نرويجي أو أوغندي ويبيع اللاعيبة اللي بتحزق عشانهم ويجيب لاعيبة من بروكينا فاسوا تحزق عشانهم بردوا🤠

ممكن تصحى الصبح تلاقي رئيس النادي بتاعك شخص مختل عقليا أو شخص مهزأ أو حرامي مثلا وبيتحكم عليه في قضايا هدايا جريدة الاهرام أو شخص له فديوهات مسربة وقمصان نوم أحمر وأسمر = فهدي نفسك وبطل حزأ في المبادي والقيم والفن والهندسة، أنت أخرك تسقف ومتقدرش تعمل حاجة فبطل عبط.

تقريبا أنت بتحسب إنه حلال لو شتمت شخص عشان هو غير واعي وقرر يشجع او يلعب لنادي منافس بس للأسف ده مش حقيقي وهتتحاسب عادي ويقتص منك واللي مش مفاجئ إنك لو قذفت محصنات عشان حاجة زي دي هتتحاسب على كبيرة من الكبائر بردو

في تعليقات ومنشورات مأفورة شويتين لو  أنت منهم وبتحسب إن ولاءك لفريق معين لدرجة أن الكافر الأنباوي أقرب إليك من المسلم البتروجاوي  وده شيء عادي كإنتماء لفريق وكده لكن ده أمر كبير جدا جدا جدا وأوثق عرى الإسلام عموما إن بغضك وحبك يكون لله مش لكرة .. وولاءك يكون لله بردو!

تخيل بقى تقعد تحزأ عشان لاعيب كرة وبعدين تفاجيء أنه هو نفسه راح الفريق المنافس عادي خالص عشان فلوس زيادة = شكلك تافه أوي يعني 

تخيل إنك تقدر تتفرج وتستمتع أحيانا وتبقى ريلاكس وتسيبها ماشية وبلاش افورة وتنشنه وكلام فارغ 👍