أول_مرة_أحكي_الكلام_ده خلوة_منتصف_العمر

#أول_مرة_أحكي_الكلام_ده

من حوالى شهرين اتعرضت لعدة صدمات نفسية متتالية ومشاكل أخرى كانت كفيلة تسبب لى اكتئاب حاد

وتعبت نفسيا جداا وقتها  وده كان أول مرة أتعب فيها فى حياتي بالشكل ده ، لدرجة إني فكرت أزور طبيب نفسي ، عشان اعرف اخرج من الحالة ده.

لغاية لما جه قدامي قدررا  قول الله تعالى "وَإِنْ يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ"

.

ساعتها قررت أعتزل العالم فى غرفتي بدون تيلفون أو واتس أو فيس أو انترنت أو كمبيوتر أو تلفزيون ، وإلجأ إلى الله ليبصرني بنفسي وأقدر اخرج من الحالة النفسية اللى كنت فيها  ،  ومكنتش بخرج إلا للضروة القصوى لشراء الطلبات ، وأرجع لعزلتي مرة أخرى ،

#وقعدت_حوالى 30 يوم أواكثر

.

وسميت العزلة ده   #خلوة_منتصف_العمر 

لحديث النبي صلى الله عليه وسلم (أعمار أمتي بين الستين إلى السبعين) ، وانا عمرى 28 وقاربت على ال30 ...... فكأن نصف عمرى قد مضي ... والعلم عند الله.

.

وبصراحة كانت فرصة عظمية  عشان فترة الحظر بتاعة كورنا  ، والكون كله ساكن ،إن الواحد برضه  يسكن مع نفسه  لتقييم ما مضي من عمره واستخلاص العبر واستفاد بها فى حياتي الباقية.

.

#وقبل ما أعتزل كتبت أهدافي اللى محتاج اخرج بيها فى نهاية الخلوة ده

وخدت شوية كتب من مكتبتي لعلها تفتح لى بعض الافكار فى التأمل الذاتي لنفسي(هذكر الكتب ده فى منشور منفصل) + مصحف وسبحة + اجندة فاضية اسجل فيها ما أتوصل اليه من خواطر أثناء التامل الذاتي

.

وفضلت منعزل لغاية لما جاوبت على أغلب الأسئلة ؛ لأن فى أسئلة كانت صعبة جدااا ومحتاجة فترة أطول للاجابة عليها

.

وبعد الانتهاء من الفترة ده الحمد لله الواحد خرج أكثر اتزانا ، مع رؤية اوضح لشغلى الفترة الجاية ولحياتي بشكل عام ، واتعلمت منها حاجات بعمرى كله ، اتعملت حاجات عمرى ماكنت اتخيلها  ابدا عن نفسي 

.

#علي_سبيل_المثال 

اكتشف إن عندى بعض نقاط الضعف اللى عمرى ماكنت اتخيلها انها ممكن تكون عندى اصلا 

ولكن لما جيت راجعت شريط حياتي اللى فات فى بعض المواقف 

لاقيت ان فعلا نقطة الضعف ده كانت موجودة ومترسخة عندى  فى المواقف ده وكان لها تاثير واضح ، ولكن عمرى ماخدت بالى منها

#الشاهد بدون فهم النفس بطريقة عميقة 

هتفضل ضاحكة عليك بالحاجات اللى هيا عاوزاك تعرفها عنها وبس، عشان تحقق لنفسها راحتها ومصلحتها ، ومتقدرش تتحكم فيها .

.

واكتر حاجة اتعلمتها : إن لو حالتك النفسية صعبة جدااا ، مش هتعرف تسيطر عليها إلا لما تكون فاهم نفسك كويس ، ولا يمكن تقدر تفهم نفسك كويس إلا بالاستعانة بالله (لأن ببساطة هو سبحانه إللى خلق نفسك ، وبالتالى هو أدرى بيها من أى حد ، 

 " وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يُرِدْكَ بِخَيْرٍ فَلَا رَادَّ لِفَضْلِهِ ۚ "

.

.👇👇

#وده بعض الأهداف اللى حطتها لنفسي عشان اخرج بيها فى نهاية الخلوة :

- الاستعانة بالله عز وجل ولكن بشكل مختلف عن قبل كده 

- الوقوف على أخطاء الماضي ، ومعرفة الأسباب لتجنب تكرارها ، و وضع تصور للحياة القادمة.

- معرفة الحيل النفسية التى كانت نفسي بتوقعني فيها ، كيفية تجنبها فى حياتي القادمة

- 

-  إعادة ترتيب القيم الشخصية التى كانت فى حياتي الماضية  لتناسب ما تبقي من عمرى (هكتب القيم ده وازاى تختار منها فى منشور آخر)

- هل نصف حياتي الماضية كانت تمضي نحو ما أريد فعلا؟ ولماذا ؟

- ما الخبرات التى حصلت عليها فى حياتي الماضية ، وماذا أحتاج من خبرات أخرى لحياتي القادمة؟

- 

- ما الأوهام التى أكنت أعيش فيها بدون أن أشعر؟

- هل صورتي الشخصية هى نفس صورتي أمام الناس؟

- ما النعم التى أنعمها الله عز وجل عليا منذ ولادتي إلى الآن ؟

- 

- مين القدوات اللى كنت بقلدهم ، وهل هما مناسبين لى اني اقتدى بهم فى حياتي القادمة  ؟

- ايه اسوء صفات كانت ممكن تكون فيها لو مفيش قيم بتحكمني ؟ ( التمرين ده فى غاية الاهمية، هشرحه بعدين)

- هل انتاجيتي فى نصف حياتي الماضية ده كان أقصي ما يمكنني تحقيقه؟

- 

- كيف أطيل عمرى الانتاجي ؟

- هل حياتي الماضية ده توصلني للجنة؟ولماذا ؟

- لو تبقي لى 6 شهور فى حياتي ماذا سأفعل ؟

- 

- هل تساوى حياتي ثمن بقائها ؟

- لو علمت أنني لن أفشل بماذا سأطمح فى فعله ؟

- وأخر شئ : ماذا سيخسر العالم بموتي ؟

وفى أهداف تانية اشتغلت عليها ولكن دول الاهم ، كل سؤال من دول كان له طريقة مختلفة فى الاجابة عليه  

#وبإذن_الله الفترة الجاية هشرح حاجات كتيرة فى منشورات متتابعة اتعلمتها (بفضل الله وحده)  فى عزلتي ده ،و هشرح بعض الأسئلة وازاى جاوبت عليها ؛ لعلها تكون مفيدة لحد منكم محتاج ياخد الخطوة ده ، أو مأجلها ، او ميعرفش أهمية حاجة زى ده ، او مش بيعرف يقعد مع نفسه .

#خلوة_منتصف_العمر