عشر نصائح ذهبية لإفساد الحياة الزوجية😎😇

عشر نصائح ذهبية لإفساد الحياة الزوجية😎😇
1- انتقدوا بعض طول الوقت ..انتقديه قولليله عمرك ما عيشتنى لحظة حلوة ..قوليله غيرنا مبسوطين وبيخرجوا وانت مش عارف تعمل زى جوز أختي أو زميلتي ...حسيسيه بإنه ولا حاجة اديله مترحميهوش 😃 ...وانت اوعى تسكت  قولها انتى تخنتى ..انتى خسيتى ..وشك كرمش ..قولها شايفة الستات الحلوة مش انتى ! 😒..اهدم انثوتها و شككها في نفسها👌

2-زني زني زني،، كمان مرة افضلى زني عليه واتصلي عليه كل شوية غرقيه رسايل و لما مايردش أو يزهق .. اتخانقي معاه!! .. قوليله انت مبتحبنيش ولا عمرك حبتني ..ايوووة اوعي تقولى ان ده احساسك  🤚 اتكلمى عن الامور السلبية "بيقين"  ..وانت كمان اهملها قولها انتي زنانة وانتي مش مقدرة الضغوط اللى عليا ولا بتحسي بيا 💥💥

3- أوعي تتكلمي عن مشاعرك أو احتياجاتك لحسن تبقي ست مش تمام بعدين يفكر فيكى بطريقة وحشة👎..افضلى كده اهرى وانكتي فى نفسك شمعة تحترق لحد ما البيت كله يولع وتنوروا الدنيا كلها ياحبايب قلبي 😁

4-لو فكرتى تطلبي أي حاجة أو تتكلمي عن احتياجات أو تعرضي مشكلة اختاري الوقت الغلط 😇 ..اضربي بوز بعد يوم شغل طويل وابدئي فى طلباتك ولا أقولك استني لما تيجوا تاكلوا أو أول ما يدخل من باب الشقة👍.. اسمعي مني   النصايح دي بتجيب نتايج مبهرة حتى اسألي فى محكمة الأسرة 😁

5- حاصريه👌 عينك ماتغفلش من عليه .. باسورداته كلها معاكي و كل شوية تفكريه إنك مصحصاله و أحسنله مايلعبش بديله.. و لو لقيتي بوادر اعجاب بواحدة غيرك  "جرسيه" عشان يقف عند حده بدري..  بصي أهم حاجة قرون استشعارك تفضل شغالة فيه شكى شكى كمان لحد ما يجيب دم  ويبدأ يفكر فعليا يدور على احتياجاته بره ليه لا ما هي فكرة مش بطالة 😃

6-هددها كل شوية بالطلاق وانك هتسيبها كده تضمن انها تتحمل ارفك وذكائك الخارق ..فكرة اتهرست فى 100 فيلم عربى وعلشان كده محدش هيتوقعها  😎  ..اوعى تحسسها بالأمان..اوعى ثم أوعى ثم أوعى تطمنها .. ايووون زمبؤولك كده..

7-حسسيه إنه مش مالي عينك و أقل منك وانك وافقتى به شفقة على شبابه المأسوف عليه وان كان جايلك 5 طيارين واربعة ظباط واتنين شاورمة وواحد بابا غنوج.😏..بس انتى اتنازلتى ووافقتى عليه علشان حظك النحس ..

8-متاخدش رأيها فى اى حاجة رأى الست بيجيب الخراب ..ست ايه ياراجل اللى هتاخد رأيها دول ناقصات عقل و ماتاخودش منهم غير الهري الكتير  ....انت راجل لازم رأيك يبقى من دماغك..

9- أول ما يحصل حاجة غلط لوموا بعض و كل واحد يرمي على التاني المسؤولية.💃💃 لما الولاد يعملوا حاجة غلط قولها تربيتك يا هانم .. هم ولادها مش ولادك ..إنت يادوب تعطفت عليها ومنحتها حيوانك المنوى نادر الوجود .. لما يقصر في البيت اديله ماترحميهوش 💥... ماهو أصله فندق و هو واخد بنات الناس يعذبهم معاهم .. بصوا من الاخر شماعاتكم بقى وحيلكم الدفاعية وانزلوا على دماغ بعض بيها 👌..

10_احكوا مشاكلكم لاهاليكم و أصحابكم وطلعوا العبر فى بعض ..و بعدين تتصالحوا انتوا و هيفضلوا هما فاكرين السواد اللى حكيتوه و على حسب درحة وعيهم و نضجهم هيقوموا هما بالواجب كله بعد كده 😁😁

بالتصرفات دى انتوا واخدين الدولى مش هيبقى فيه مطبات ولا حفر نحو حياة زوجية بائسة و لو استمريتوا شوية هتبقى النهاية التعيسة فى محكمة الاسرة او عند مأذون واحنا كدكاترة نفسين موجودين علشان اعادة التأهيل وتخطى ما يمكن تخطيه 😇

 📌